انا بسغيث صلاح جاهين

يا هــوه يا هــوه أنـا باستـــغيث
م الفــوضـــى فـى أخــد الدوا
الطـــب والعــلـــم الحــديـث
منـعــوا العـــلاج بالفـهـــلـوة
وإذا الـدوا أصـبــح مـــرض
يـبـقـى عـلـى العـقـل العــوض
يا هـوه . . يا هـــوه

مهدئـات ومنبـهـات ومـســكنـات
فيتامين ألف به فى العضـل أو فى الوريد
أقـراص نقط كبسـول سفـوف مستحلبات
ده كالسيـوم وده ملـح سفـرة وده حديـد
وكـم لمرضـى الوهـم من مستحضرات
فى كل يـوم فى الصـيدلية شىء جديـد
ألوانــه تضــوى
أسمـاؤه تـــدوى
وفـى النهــايــة
أسعــاره تــكوى
عرفـتـوا لـيـه أنــا بـاسـتـغـيـث
مـن هـوسـة العـصـر الحــديـث ؟
واحد يقـوم عرقـان فى تـكييف الهــوا
يسفح فى شطـةوبيض مبعـكك بالدهـون
ولا يكتفـى إلا إن أكل خروفيـن ســوا
وأتـى على كل الـذى كان فى الصـحون
ولمـا يمـرض يتهــم نــوع الــدوا
إنـه لا مهضـم معجـزة ولا يحزنـون
ويقـول هـاتـولى
عقـار أصــولى
فى حمــايته آكل
كما يحـلولــى
عـرفـتـوا لـيــه أنـا بـاستـغـيـث
مـن هـوســة العـصـر الحــديث ؟
سألت شـريب أدويـة بتعشقهــا ليش ؟
قـال أصـل ألوانهـا فى منتـهى الجمال
أحب لاحمــر وكـمان لابيض فى بيـج
والمشمـشـى والفستـقـى ودم الغـزال
أنا قلـت له ودى كلهـا فايدتـها إيـش ؟
قال عقـلى مهو دفتر ياخـى بطل جـدال
بـلاش تـدقق
وخــد ونقنـق
كبسـول مـلون
أبيـض فى أزرق
عرفـتــوا لـيــه أنـا بـاستـغـيـث
مـن هـوسـة العـصـــر الحديـث ؟
لاتحسـبــوا إنـى أنا ضــد العلـوم
ومنايـا تحطيــم المعامـل والزجــاج
أنا ضـد أخـذ الأدويـة أخـذ الغـشـوم
وضـد لقـط الأدويـة لقـط الدجــاج
لو رِدت تـاج الصحـة فوق راسـك يدوم
درهم وقـايـة أبقـى من قنـطار عـلاج
لا تـكون أنـانـى
ودع القنـانــى
لحــد تــانــى
فعــلا يعــانـى
مــرض حقيقــى
مش بهــلوانــى
عرفـتــوا لـيــه أنـا بـاستـغـيـث
مـن هـوســة العـصـر الحـديـث ؟

» صلاح جاهين
» ربعيات صلاح جاهين
» كلام الليل صلاح جاهين
» انا واللى بحبه صلاح جاهين
» اشعار صوتية لصلاح جاهين