مش كفاية
رسالة لكل عيلة مات فيها الحوار رسالة لكل ام من كتر خوفها على ابنها
ومن غير قصد ممكن يطلع جبان رسالة لكل عيلة بتربى اولادها على اهتمامها بالدراسة وتكنيزها للمعلومات لنفسها وبس رسالة لكل عيلة بتقفل على ولادها
و بيربوهم تربية مغلقة ولما يحاولوا يطلعوا يغرقوا ودعوة للحوار عن العالم الخارجى وعن قيم مهمة ذى الانتماء
سامحينى يا امى لو رميت اللوم عليكى فى البداية
و اسمعى منى يا امى هى ايه اصل الحكاية
لما جيت للدنيا بعد ظلمة شهور
ملقتش قدامى غير ملاك بيحولى الظلمة نور
جيت بضحكة طفل برئ
معرفش غيرك صديق
وقفتى جنبى وكنتى سندى وبقيتى اهم حاجة عندى
علمتينى المشى والكلام
علمتينى الحب والاحترام
بس سامحينى يا امى
.
.
.
.
مش كفاية
اسمعينى بس لحظة واحكمى انتى فى النهاية
جميلك يا امى دين على
وفى النهاية انتى اللى ليا
متستغربيش من لومى ليكى
ومتشككيش فى حبى ليكى
خوفك على نسانى كلمة جرئ
خلانى بالدنيا اضيق
من صغرى مبشفش غيرك
غرقان فى حبك وفى خيرك
مسكتينى اول قلم علمتينى اول كلام
بس هو العلم ويعنى ايه كلمة سلام
كلمينى عن الوطنية هو ليه مات الكلام؟؟
علمينى اكون فدائى افدى وطنى بدمائى
مش اخاف و انام فى سريرى واسيب دورى لغيرى
علمتينى اذاى امشى ومقلتليش فى انهى سكة
وبقيت فى الدنيا اخبط ما انا اصلى ضايع خلقة
خرجت للعالم فجأة حسيت بضياع وخنقة
جواية طاقة كبيرة وفى قلبى اكبر حماسة
لقتنى بعامل الناس من غير خبرة ولا كياسة
مش فاهم اعمالهم مستغرب ردود افعالهم
مش دى دنيتى ومش دى تربيتى
ليه مش كلهم تفكير واحد الصح صح والغلط غلط
حسيت انى كنت بجمع عقد كبير وفى لحظة كله انفرط
حسيت بالانزعاج وعدم القدرة على الاندماج
رمتينى فى المحيط وقلتيلى يالا عوم
ومهما كان غويط هتتعلم فى يوم
من صغرى باسمع كلام بالنسبه لى مكنش مفهوم
صاحبك فى المدرسة وبس او لو هتاخد عنده درس
متركزش غير فى دروسك وامشى جنب الحيط
متديش معلوماتك لحد وخليك حويط
طب ثوانى هو ليه مفيش خيار؟؟
علمينى اكون ايجابى خلينى اشارك فى الحوار
علمينى كلمينى وانصحينى
فهمينى وافهمينى
واعذرينى
اعذرينى لو رميت اللوم عليكى اصل الحكاية
انى معرفتش غيرك من البدايةوصدقينى مكنش كفاية
مش كفاية
موضوع: مش كفاية 
السبت أكتوبر 01, 2011 10:07 pm